كشفت الفنانة نادية مصطفى، عضو نقابة المهن الموسيقية، كواليس مكالمتها الهاتفية مع شقيق ووالدة الفنانة آمال ماهر، والطلب الذي ناشدتها به، وذلك أثناء مداخلتها الهاتفية لبرنامج "حضرة المواطن" عبر شاشة قناة "الحدث اليوم".

وقالت الفنانة نادية مصطفى: "مش عارفه إيه الهدف من التشكيك من صدق اللي حكيته عن المكالمة، أنا، اللهم بلغت، اللهم فاشهد، وما على الرسول إلا البلاغ، اللي حصل بالظبط إن أنا من 7 أيام وأنا شايفة خبر متداول على السوشيال ميديا عن آمال ماهر، لو في حد منزل الخبر ده هنتواصل معاه ونقوله أنت جبت الكلام ده منين، لكن مجرد صورة وخبر مش عارفين مين؟، مين اللي منزل مصدر ده مش عارفين مين؟، والناس مع ذلك مصدقة، الناس عاملينلي منشن، وأنا كنقابية طبعا واجبي تجاهها كإنسانة وكزميلة و كعضو في النقابة، أو كانت أعلنت اعتزالها من سنتين، وكل الناس شافت الفيديو أو البوست اللي هي كانت حاطاه".

واستكملت: "فابتدت رحلة البحث عن طريقي وعن كل زمايلي أعضاء مجلس الإدارة والأستاذ هاني شاكر المحترم، نقيب الموسيقيين، عن تليفونها الشخصي، كل الأرقام اللي عندنا، مش عارفين نوصلها من خلالها".

وردا على الأسئلة أوالتشكيك،:" بيشككوا فيا أنا وهاني شاكر، طب إنتوا ما تواصلتوش معاها هي ليه؟ اشمعنا مع أخوها ومامتها؟، طب ده الرقم اللي جالنا، حاولنا من خلال كذا رقم ومحلصش إلا من رقم أخوها كان معايا، وربنا يكرمه طمني، وقالي هي آمال بخير، طب ليه يا حبيبي مبتطلعش تعمل لايف؟ راح قالي هتعمل لايف، قولتله إمتى؟ الناس عاملة بلبلة في الشارع غير طبيعية، لو كانت بخير من فضلك خليها تطلع تعمل لايف، راح قالي، إن شاء الله هتعمل، قولتله طب ممكن آجي أزوركوا؟ قالي آه طبعا ممكن تيجي تزورينا تفضلي تنوري".

وأضافت:"ماما حتى مع حضرتك أهي، راحت كلمتني ماماتها، ياحجة إزاي حضرتك؟ قالتلي إن آمال بخير والله اطمني يا مدام نادية، ومن فضلك ردوا عننا، إنتوا كنقابة ردوا عننا، الناس مش مصدقانا، أخوها طلع قال إنها بخير، ومحدش مصدقه، معرفش، مش عارفه ليه؟ قولتلها يا حبيبتي محدش هيصدق إلا لما هي تطلع تقول بنفسها، ما تخليها تطلع تقول كلمتين تطمن حبايبها، راحت قالتلي هتعمل بس في الوقت المناسب، هي من سنتين، غابت ولما رجعت الناس بهدلتها، فهي خايفة تطلع دلوقتي، طب أنا أعمل إيه؟".

واستطردت: "الحمد لله، والله أنا عمري ما كذبت، والناس كلها عارفة إني طول عمري صريحة، وأنا لا أخشى في الحق لومة لائم".

واختتمت:"أنا بناشدها، اطلعي طمني حبايبك عليكي، بس مش مطلوب منها أكتر من كده، ومش أخوها، ولا ماماتها اللي يتكلموا، هي اللي تطلع تقول أنا يا جماعة بخير، وحقكوا عليا، تأخرت عليكوا، كانت نفسيتي تعبانة، أي حاجة تطلع تطمن الناس، بس هو ده المطلوب، وكل الناس اللي أهانوني أنا عاذراهم، بلتمس العذر ليهم، لإن هم خايفين عليها، بس يطلعوني أنا من الموضوع، أنا مش مسئولة، لما أقول عن لسان أمها إن هي بخير، يبقى أمها اللي مسئولة، لو كانت هي في خطر، بس ونقطة من أول السطر".

ونشرت الفنانة آمال ماهر منذ أيام مجموعة صور على شاطئ البحر، تفاعل معها جمهورها.