في جديد واقعة مشاجرة لاعب النادي الأهلي إمام عاشور بمول شهير بمنطقة الشيخ زايد التابعة لمحافظة الجيزة المصرية، تكشفت تفاصيل تعرض زوجته للمضايقة على يد مجموعة من الأشخاص داخل المركز التجاري، حيث أكدت أن الأمن قال لها "الدنيا عيد والكل بيتعاكس".

 

وقالت زوجة اللاعب المصري في التحقيقات التي اطلع عليها دفاع إمام عاشور: "اللي حصل إن يوم الأربعاء أنا كنت رايحه السينما مع إخواتي وأهلي وبعد شباك التذاكر من اليمين سمعت ناس ورايا بيقولوا دي مرات إمام عاشور شكلها.. وتعدوا عليا لفظيا وتحرشوا بيا بألفاظ مش كويسة".

كما تابعت: "بعد كدا سمعت حد بيقول للتاني تعالي وراها وطلعت على السلم الكهرباء وأخويا مشي معايا وفضلوا ورايا بيتريقوا وأنا مش مركزة بيقولوا إيه وأخويا مسكني من أيديا واستنيت باقي إخواتي علشان أخلي الناس اللي ضايقوني يعدوا الأول ولما أخويا الكبير جه روحنا وقفنا عند الراجل بتاع التيكت وأخدنا التيكت والشباب دي فضلت واقفة يبصوا علينا ويضحكوا ولما دخلنا القاعة مبصتلهومش وقعدوا يقولوا دي مرات إمام عاشور ويتحرشوا بيا"، وفق ما نقله موقع "القاهرة 24".

وأضافت "بعد ما الشباب دول اتحرشوا بيا كلمت جوزي وأنا في السينما قولت له اللي حصل علشان يكلم أخويا معاذ يهدى علشان هو متعصب وفيه ناس ضايقوني وعايز يتكلم معاهم وإمام كلمه ومعاذ حكى لإمام اللي حصل وإمام عاشور قاله متعملوش حاجة وبعد السينما روحوا قولوا لمشرفي الأمن، وقال لأخويا إنه جاي علشان يروح يعمل محضر".

وأضافت زوجة لاعب الأهلي: "بعد ما خلصنا سينما طلعت أنا وأهلي وأخويا معاذ الصغير قال لأخويا عمر الكبير هما دول وعمر قالهم انتوا عاكستم أختي وكان معاكم واحد بجلابية وساعتها قعدوا يتريقوا ويقولولهم جلابية إيه وقعدوا يضحكوا وساعتها بتاع الأمن جه وسألنا فيه إيه.. وعمر أخويا قاله إن فيه شباب اتحرشوا بيها وشتموها ومشرف الأمن قاله عادي ومشرف الأمن قاله باستهزاء كل الناس بيحصلها كده إحنا في عيد".

وفي وقت سابق قررت جهات التحقيق إخلاء إمام عاشور لاعب النادي الأهلي عقب الاستماع لأقواله، في واقعة التعدي على فرد أمن داخل مول أركان بالشيخ زايد، عقب تعرض زوجته للمعاكسة داخل المول.

وكانت جهات التحقيق استدعت إمام عاشور لاعب النادي الأهلي للاستماع لأقواله، في واقعة التعدي على فرد أمن داخل مول تجاري بالشيخ زايد، عقب تعرض زوجته للمعاكسة داخل المول.

وشهد مول أركان بالشيخ زايد، نشوب مشاجرة بين لاعب النادي الأهلي إمام عاشور، وفرد أمن بالمول بسبب معاكسة زوجة لاعب الأهلي على يد مجموعة من الأشخاص بداخل المول وحدثت مشاجرة بينه وبين فرد الأمن بسبب رفض الأخير دخوله المول للتعدي على مضايقي زوجته.