صور #أحمد_السقا ينعي عروسين مصريين توفيا في طريقهما إلى الزفاف

نعى الفنان أحمد السقا عروسين مصريين شكل خبر وفاتهما بحادث سيارة أليم وهما في طريقهما إلى الزفاف صدمة للنجم المصري.

أحمد السقا نشر صور للعروسين وعلق على الخبر بالقول: "العريس اللي في الصورة ده اسمه أحمد حجازي، مهندس، ودي عروسته اسمها نيّرة، اخصائية تخاطب، الاتنين من برج العرب في اسكندرية. اللي بتصوّرهُم دي اخت العريس اسمها أماني، والصورة دي كانت في الكوافير امبارح بليل قبل ما يطلعوا عالقاعة بتاعة الفرح..
بعد ما خلّصوا الكوافير وهما في طريقهم مزفوفين للقاعة عملوا حادثة مروّعة عالطريق والعربية اتقلبت بيهم، العريس وعرُوسته ماتوا واخت العريس نجت من الموت باعجوبة وهي في حالة خطرة حالياً ..
نيّرة من 4 أيام بالظبط كتبت البوست ده عالفيسبوك بتاعها وقالت للناس "ان شاء الله فرحي يوم الخميس 17 -9 وعقبال عندكم كلكم وافرح بيكوا كلكوا"..".

وختم أحمد السقا تدوينته بالقول: "مش متخيّل منظر أهلهم وصحابهم وكميّة القهر اللي في قلوبهم بعد ما كانوا قاعدين مستنيين وصولهم وفي انتظار دخولهم سوا من باب القاعة وسط الزغاريط وبوكيهات الورد فيقوم جايلهم خبر موتهم ..
الموت بقى أقرب لينا من أي حاجة، وبييجي في أي وقت حبيت الناس كلها تعرف قصّتهم عشان ندعولهم بالرحمه وندعي لأهاليهم وصحابهم بالصبر والثبات ..
ربنا يسامحهم ويغفرلهم وزي ما كانوا عايزين يكمّلوا حياتهم سوا في الدنيا يجمعهُم ببعض في الاخرة ويكملوا حياتهم الأبدية في مكان أحسن من هنا، في الجنة ان شاء الله ..
ربنا يرحمهم ويرحمنا جميعاً".