فسّر الماء بعد الجهد بالماء
كتب عضو المكتب السياسي في حزب الوحدة الشعبية، الدكتور فاخر دعاس، منشورا عبر صفحته على موقع التواصل الاجتماعي فيسبوك بعنوان "فسّر الماء بعد جهد بالماء"، حيث علّق فيه على المؤتمر الصحفي لوزيرة الطاقة هالة زواتي ووزير المالية عزالدين كناكرية حول آلية تسعير المحروقات.
وتاليا ما نشره دعاس:
"فسّر الماء بعد الجهد بالماء"
هذه الجملة تلخص المؤتمر الصحفي لوزيرة الطاقة ووزير المالية حول آلية تسعير ة المحروقات ..
الوزيرة قدمت آلية التسعيرة الموجودة على الموقع الإلكتروني للوزارة دون زيادة أو نقصان.
طيب معاليكِ، ليش شكلتوا لجنة لدراسة آلية التسعيرة، إذا كانت بدها تعطينا نفس الآلية الموجودة عالموقع؟! والا اللجنة هاي كانت مهمتها تعلمللنا "إنفوغرافيك" للتسعيرة؟!!
معاليكِ، لا يكون مفكرين إنه الناس طلعت عالشارع واحتجت عشان مش عارفة تحسب وتجمع وتطرح، وجابوكم عالوزارة عشان تجمعولنا مجموع الضرائب وتطلعوهم ببند واحد؟!!
معاليك، والله عيب اللي بتسووه فينا، وحجم الاستهبال اللي بتمارسوه على هالشعب المسخم ..
معاليك، المنظمات الدولية اللي كنت تشتغلي فيها، كانت تقبل منك هيك تصريحات؟! أو كنت تجرئي إنك تحكي هيك تصريح؟!!
معقولة معاليك تحكيلنا إنه الاعلان اليوم عن التسعيرة "يأتي لانهاء حالة الجدل حول الموضوع وتوجيه الطاقات نحو مواضيع اخرى".
وااااااال يا بنت الحلال؟!! لهالدرجة شايفيتنا عبيد عندكم؟!! إنه انتِ بتطلعي بهيك تصريح، و"بتتخوثي علينا"، وفي الآخر مطلوب منا "انسد اثمامنا" ونهلل لمعاليك ول"إنجازاتك" العظيمة؟!!
معاليك، الناس طلعت عالشارع مش عشان تحكيلها إنه أكثر من نصف سعر البنزين ضرايب، ولا عشان توضحيلها إنه الكاز "اللي هو للفقراء" عليه 26% ضريبة. لأنه هاي الأرقام كلها موجودة على موقعكم من زماااااااااااااااان.
إحنا طلعنا لأنه كل فيلم الضرايب هذا مش عاجبنا ولأنه الأردن من أعلى الدول في العالم -إن لم تكن أعلاها- في الضرائب على المحروقات.
معاليك، أنا فهمت من تصريحك إنه إنتي وحكومة الرزاز، استمرار لحكومة الملقي، وإنه رفع أسعار المحروقات تحصيل حاصل. بس اللي معاليك ما عرفتيه، إنه احنا كمان جاهزين نرجع عالشارع ونمارس رفضنا لسياسات وإملاءات صندوق النقد ولحكومة الرضوخ و"الاستعباط". #للحديث_بقية
تابعو الأردن 24 على 
