رسالة من كلودين روكز إلى والدها الرئيس: "سقف الحريّة هو الحقيقة مش الشتيمة"

بعنوان"وعّيتني عحب الوطن"، توجّهت ابنة رئيس الجمهورية ميشال عون، كلودين عون روكز، برسالة إلى والدها، في حسابها عبر "إنستغرام"، وقالت: "وعّيتني عحب الوطن، قلتلي إنو كل شي ببلش بحلم، حلمت بلبنان سيّد، حرّ ومستقل وتحقق الحلم، وحلمت بلبنان التعايش والانفتاح والمحبة، زرعت فيّي التفكير الحرّ، ولا مرة ما سمعتني، ودايماً احترمتلّي رأيي، وشجعتني دافع عنو، علّمتني الصّدق، علّمتني كون سيّدة، حرّة ومستقلّة، وكون تيّار ووطنية وديموقراطية، وإحترم رأي غيري، علّمتني إنو حرية المعتقد الديني والسياسي مقدّسة، وإنو فكر الإنسان حرّ بحلّق كيف ما بدّو وهو وحدو بيتحمل مسؤوليتو بالخطأ وبالصواب، وإنو حقّ الاختلاف وحرية التعبير هنّي ثوابت ما لازم نمسّ فيون تما نخسر الوطن، علّمتني إنو سقف الحريّة هو الحقيقة، مش الشتيمة والأذى والكذب، علّمتني قول الحقيقة وبسّ الحقيقة، لأنا وحدا بتحرّرنا، بحبك لآخر الدني وبحبك لكل دقيقة عزّ وفخر عيّشتني ياها".