هنا الزاهد بعد وفاة هيثم زكي: لو بتحب حد قوله.. الحياة مبتستناش

وجهت الفنانة الشابة هنا الزاهد رسالة خاصة عبر صفحتها بموقع فيسبوك عقب وفاة الفنان هيثم أحمد زكى، مطالبة الجميع بالكشف عن حبهم للمحيطين قبل فوات الأوان.

وقالت هنا الزاهد: الناس كلها بتموت ورا بعض وناس عمرك ماتتوقع أنها هيحصلها حاجة.. الحياه دي بجد تخوف حاول تبقى على قد ماتقدر مع الناس اللي بتحبهم ولو بتحب حد قولوا بحبك الحياه مبتستناش زعلان من حد صالحوا الحياه دي دقايق عايشنها وماشيين كلنا ف عشها مبسوط متجيش على نفسك عشان حد، مضايق من حاجة قولها علطول.

وأضافت هنا الزاهد: متشلش الهم.. عايز تبعد عن حد ابعد المهم سعادتك و حياتك تبقى في سلام. متتأخروش في السوال على بعض و كفاية انتقادات وكلام سلبي لبعض الواحد مبقاش ناقص اي انتقاد، حبو نفسكوا اوي وابسطوها بأقل حاجة دايما خليك مع الناس الايجابية اللي بيخلوك ايجابي زيهم وابعد عن الناس السلبية. حبوا اهلكوا اوي لان انتو من غيرهم ولا حاجة لان دول اكتر ناس هيحبوك و هيخافوا عليك في حياتك. واحمد ربنا علطول ان اهلك عايشين و بصحة، احمد ربنا انك بصحة، فمتجوش على صحتكوا عشان حد حتى لو بتحبوا الدنيا مش دايمة لحد! عيشها مبسوط . ربنا يرحم كل اللي راحوا و يرحمنا.