رسالة مؤثرة من طبيب أردني يعالج مرضى كورونا

وجه أحد الأطباء الذين يعملون على علاج مرضى كورونا أمس السبت، رسالة تحدث فيها عن تفاصيل الوضع الذي يعيشه الطاقم الطبي، في مواجهة وباء كورونا.

ووجه الطبيب قتيبة مياس عبر حسابه على موقع فيسبوك رسالة لكل من يقول أن الممرضين والأطباء هم سبب العدوى فقال: " انت ما عشت موقف انك تروح عالبيت من المناوبة و طول الطريق تدعي انك ما تعدي ابنك و بنتك و أمك ، ما عشت تروح عالبيت ابنك يجي بده يلمسك تبعده عنك كأنك بتعاني من الجرب و ابنك بكون يبكي مش فاهم ليش ، بعمرك روحت عالبيت و غيرت اواعيك عالباب و فتت على غرفه مثل الحرامي و تخبيت عن اولادك اسبوع حتى تتأكد انك انعديت ولا لا؟ بعمرك عشت رعب انك تكون سبب بمرض ابنك و تكون قاعد تستنى تطلع عليك اعراض المرض؟ لا عشت ولا بعمرك بتعيش اللحظات هاي و لو عشتها رح تصير تأدي التحيه لأي طبيب و ممرض بتلاقيه بالشارع" .

وأضاف: " اكثر ناس عرضه ينصابوا هم الكادر، وهذا طبيعي ، بعمرك شفت حرب بدون جرحى و موتى بين الجنود؟ الغريب انه ما يكون بينهم مصابين، الممرضة المصابة انعدت من مريض و فقدت شخصين من اهلها بالمرض ، بتتخيل موقفها، انقذت مريض و تسببت بإصابة اهلها، الدكتورين المصابين وصلوا المرض لأهلهم، متخيل موقفهم؟"

وتابع: " كلمه شكرا بتكفي واحد بناوب 30 ساعه متواصلة عشانك و بعد هيك بروح عالبيت بسجن حاله بغرفه يستنى يشوف مرض ولا لا و ببعد عن اهله ، النا شهور بعيدين عن اهالينا مشانكم".

ودعا قتيبة إلى عدم مهاجمة الطواقم الطبية عبر منصات التواصل الاجتماعي، مرفقاً منشوره بصور لوجبات الغداء والعشاء التي يتم تقديمها لهم.