إيمان العاصي: كذبتُ وقلتُ اعتزلت الفن.. وهذه مواصفات فتى أحلامي
جو 24 :
كشفت الفنانة المصرية إيمان العاصي سر ابتعادها عن التمثيل 3 سنوات في بدايات مشوارها الفني، مؤكدة أنها شعرت بالخوف حينها من الشهرة والجمهور.
وقالت العاصي خلال لقائها مع برنامج "الجانب الآخر": "أنا ظلمت نفسي في شغلي بسبب كسلي، وأخيرا حاولت أسترجع شغفي، وطبعا أنا قابلت كتير وتعرضت لسوء حظ في علاقاتي مع الناس وفيه ناس ضحكوا عليا في مجال التمثيل".
وأضافت: "ومش بكون قادرة أخد حقي منهم وبكتفي بأني أقطع علاقتي بالأشخاص دول، وبحاول أخلي بنتي عكس كدا وتتعود تاخد حقها؛ لأن مع الأسف العالم مفتقد للإنسانية".
وأكدت أنها اعتذرت من شركة الإنتاج التي تعاقدت معها على 3 أفلام: "كذبت كذبة كبيرة جداً على شركة الإنتاج كنت متعاقدة معها على 3 أفلام، اعتذرت منهم وقلت لهم أني اعتزلت الفن، وابتعدت 3 سنوات، وعدت بعدها، كنت أكبر وأنضج".
تأثرها بالشخصيات التي تجسدها
وحول تأثرها بالشخصيات التي تجسدها، تحدثت العاصي: "اختيار المخرج رقم واحد بالنسبة لي؛ لأن النتائج تختلف من مخرج لآخر، وعندما أعمل شخصية أعيش معها في حياتي. وعندما عملت شخصية "دلال" في مسلسل "جعفر العمدة" كنت متأثرة بها، لدرجة أنني كنت أذهب بملابس الشخصية إلى بيتي وأخرج مع أصحابي بها".
وعلقت على طرح بعض المشاهير أسرارهم الشخصية على مواقع التواصل الاجتماعي: "كشف أسرار البيوت على السوشال ميديا كارثة وده ميخصش سواء مشكلة مع زميل أو في البيت، وبقول ربنا ما يحطني في موقف زي ده".
وتساءلت عن قدرتهم على جعل أسرارهم متاحة للجميع: "تربينا أن فيه حرمة بيت إزاي بتقدروا تقولوا كده للجمهور؟ دي ثقافة عجيبة وفيه ناس بتاكل عيش من ده، وده أرخص أكل عيش ومش بحترم الطريقة دي، ونفسي الناس يكون عندهم رحمة وأصول لأن ده لو موجود في الإنسان هيتجنب حاجات كتير وحشة".
إمكانية زواجها مرة أخرى
كما تطرقت العاصي خلال المقابلة للحديث عن بعض التفاصيل الشخصية، وإمكانية زواجها مرة أخرى، لافتة: "لحد قريب مكنتش مفتقدة فكرة أني متزوجة لأني اتجوزت شهرين بس ولكن دلوقتي نفسي يكون معايا حد، ومع ذلك بتجنب الارتباط لأنه مش سهل يحصل في حياتي ولكن أدركت أن شريك الحياة مهم جدًا خصوصا لو فيه أشياء مشتركة وحب".
وأشارت إلى مواصفات رجل أحلامها: "أنا بخاف اتعلق بشخص لأن قلبي بيتكسر بسهولة وبقول الحمد لله أني مش مرتبطة، ولكن ده مش سبب ابتعادي عن الارتباط، لكن مفيش شخص مناسب وأنا كل طلباتي شخص مخلص فقط ومش كداب".
وكشفت عن مواصفات شخصيتها، مشيرة إلى أنها شخصية مترددة ومتسرعة ولا تتعلم من أخطائها.
وأضافت: "أنا مترددة ومتسرعة وبخاف ومش بتعلم من غلطي وبعمل نفس القرارات وأنا شخصية بفكر كتير وأي مشكلة بتكبر جوايا ومش لاقية حل واستسلمت إن ديه طبيعتي، لكن مش مبسوطة وتخليت عن أحلامي الشخصية لأن فيه أولويات وأتجنب أقعد مع نفسي لإني خلفت وأنا 23 سنة وتحملت المسؤولية".
علاقتها بابنتها ريتاج
وتحدثت الفنانة المصرية عن ابنتها الوحيدة ريتاج، مشيرة إلى أنها لا تتمنى أن تراها "عروسة"، وإنما شخصية ناجحة تؤثر في المجتمع.
وكشفت بعض مواصفات ابنتها: "بنتي بتحس بيا بشكل مش طبيعي وهي أحن حد عليا في الكون وأصدق حد في حياتي بكل ما تحمله الكلمة من معنى، وبنتي غريبة جدا خاصة أن هي طفلة ومش عارفة بتفكر كده إزاي ولما بتحس إني مضايقة حتى لو ما بينتهالش بتعرف".
وأضافت: "بنتي ولو زعلانة من حاجة بتحبس دموعها علشان ما اتأثرش، وبقيت أدعي ربنا أنه يخليني ليها لأنها أحلى حاجة في الحياة وصاحبتي أوي وبحكي لها اللي ممكن أحكيه لحد في سني".
وأكدت العاصي أنها تخبرها كل ما يحدث معها: "لما بكون معجبة بحد بقول لبنتي وكأنها 30 سنة، ومفيش حاجة بخبيها عنها لأني خايفة مكملش ومقدرش أعيش لها ونفسي تقدر نفسها وتحب نفسها وتكون هي رقم واحد من غير ما تكون أنانية ومتثقش في حد غير نفسها وأنا لأني مش عايزاها تتوجع".
وكشفت عن نصائحها لابنتها: "بقول لبنتي أوعي تقولي لي عايزة أتجوز وبحب حد، أنا نفسي أشوف بنتي ناجحة ومش شرط أشوفها عروسة وعايزاها تلف العالم وتكون مبسوطة".
تابعو الأردن 24 على 
