رفشة بطن / (مفلح في المدينة الطبية)
عند وصولك للمدينة الطبية تدخل اختياريا الى كراج مكون من عده طوابق ويتسع لآلاف السيارات ... ورغم ذلك فانه يضيق ولا يتسع للعدد المطلوب ... (عارفين ليش )... لان الاخ ( مفلح) يقف بشكل عرضي ويحجز مكان سيارتين في الموقف ( وانت ... الله لا يردك) ... عمرك ما صفيت .. المهم انو سيارةمفلح تبرطع بالكراج....
(تجمطها) وتتابع المسير حتى تصل الى ( الاصنصير) . وهناك ... العشرات من مفلح يزدحمون على باب المصعد رجال ونساء اطفال وشيوخ من كافه الاعمار ... تنظر الى الجهه الاخرى حيث (الدرج) .. ليس هناك اي مفلح يرغب بصعود الدرج .... بصراحه لو قدر لهذا الاصنصير ان يتكلم فان اول كلماته ستكون ... (دخيلكو..الحقوني ...لقد انهكني مفلح) .... مكتوب على المصعد .. يتسع لثمانيه اشخاص .... ومفلح يحشي المصعد بثمنطعشر شخص ... (كم انت كبير يا مفلح)
(بتكبر عقلك .. وبتطلع عالدرج هروله) ... في بيت الدرج مكتوب بقلم حبر ... مفلح يحب (م) ... طب يا مفلح احنا شو دخلنا ... وحيط الحكومه شو دخلو عشان تكتب عليه ...
ما علينا تصل الى المكان المنشود ثمه طابور طويل وانت تقف بالطابور ومن حولك بعض الاطفال (مفلح صغار) يمارسون ( خفه دم مش طبيعيه) وتكاد (تعوف حالك منهم ) ...في هذه الاثناء يدخل مفلح واثقا من نفسه ويتجه مباشره الى (راس الدور ) مطنشا الكل ويمد اوراقه للصبية خلف الكاونتر ويقول لها (مرحبا ... انا مفلح .. مشيني لو سمحتي ) .... (يعني انت مفلح وانا حسنين مثلا ) يا اخي استحي على حالك ... ناديت عليه ...قلت له اخي مفلح ... بالنسبه للناس اللي واقفين بالطابور ... لابسين طاقيه الاخفاء مثلا؟؟؟).... نظر الي مفلح بغضب وقال (ايوة يا اخي وانت ليش زعلان ؟؟؟) ... صدمني سؤاله ...فاجبته ... لا ولا اشي بس زعلان عالاوضاع بالزعتري ... منك السماح اخي مفلح ... ( مرة اخرى جمطت مفلح ) واختصرت الشر ومرقناها .... تحاول ان تنسى كابوس مفلح وتمتع ناظريك بجمال وروعه المنظر من شبابيك مستشفى الاطفال ولكن يبدو ان مفلح متمسك بحقه في التنكيد عليك ... فهو يشعل سيجاره بين الاطفال وتحت لافتة تمنع وتحذر من خطر التدخين.... !!!!!!
اخي مفلح ... انت شو بدك بالزبط .... ممكن تحكيلي ؟؟؟؟ .. تصرفاتك عملتلي اكتئاب .... يزم خليك مثل كل الشعب الاردني واعي وفهمان .... وسيبك من الهبل والبلاده بلدك محتاج لنظامك وترتيبك وحساسيتك بالتعامل مع الآخرين ... هاي البلد مش بير فاتح والكل بده ينهب ولا مركب غرقان وبدك تلحقه بشلوت.... هاي بلدك قبل تكون بلدي والمدينه الي والك وللكل ... مثل ما احنا بنستفيد منها لازم نحافظ عليها ....
