هيك رايك؟؟
مؤخراً ، صار مع كل شراء قسيمة للقبول الموحّد ، يرفق معها قوائم مجانية «للقلق» والتشتت وضياع القرار ، مضافاً اليها بعض إجراءات الحيرة؛ من العضّ على الشفاه وفرك الأيدي و»طرقعة» الأصابع و»قرقطة» الشوارب التي تنتاب الأهل وناجح التوجيهي معاً عند اختيار التخصص الذي ينوي الأخير دراسته..
أحياناً المسالة لا تخص الرغبة او المعدّل او القدرات فقط ، وإنما تدخلات فيالق «دير بالك» الذين يطرأون على المشهد العائلي فجأة ..مثلاً تتفّق جميع مرتّبات الدار بما فيهم (مقدّم الطلب) على ان «الصيدلة» مثلا..تخصص جيد ومناسب لمعدّل «شلاش»..وما ان يبدأ شلاش بتخيّل نفسه وهو يحضر عبوات «ادول الاطفال» والخربشة على باكيت الدواء بخط مزري « 3 مرات باليوم» ويضع ثلاثة خطوط قطرية على العلبة ...حتى يقرع جرس الباب أحد الأقارب ومعه «علبة توفي» مربّعة ..يجلس وزوجته مباركين للصبي ، وبعد جولة مجاملة قصيرة، يطرقون السؤال الأكثر تكرارا..
• القريب: شو ناوي يقرا شلاش ؟
• ابو يحيى: والله بعدنا متحيرين.. بس بجوز صيدلة!!
• فيحتد القريب محذراً: دير بالك!! حرام عليك...شو صيدلة؟ بعد هالمعدّل والقراية يرجع (بيّاع) ... مالكو يا جماعة؟..
• ابو يحيى بمزيد من الحيرة : والله مانا عارف..
• القريب: خطيتك برقبتي ..خليه يقرا هندسة مدنية! الخليج كل يوم بيطلبوا.
• ابو يحيى هيك رايك؟
• القريب: على عاتقي!
يخرج القريب ويدخل عديل «ابو يحيى» ومعه علبة شراب «فوستر» ..يجلس وزوجته وآخر العنقود..مباركين لــ»شلاش» ثم يطرقون نفس السؤال الاكثر مللاً...
• العديل: شو ناوي يقرا شلاش؟
• ابو يحيى: والله بعدنا متحيرين..بجوز هندسة مدنية!
• العديل محتداً: دير بالك! ابن اختي صارله مخلص 7 سنين ...وبعده مرمي بالدار..
• ابو يحيى بحيرة مضاعفة: والله مانا عارف!
• العديل: خطيتك برقبتي..خلية يقرا كمبيوتر! ما بتشوف بالجرايد قديش بطلبوا !!!؟.
• ابو يحيى: هيك رايك؟
يخرج العديل..ويدخل النسيب لكن بعلبة «توفي»دائرية هذه المرة..
• النسيب:شو ناوي يقرا شلاش..
• ابو يحيى: والله بعدنا متحيرين..بس بجوز كمبيوتر!
• النسيب منتفضاَ : دير بالك..ما سمعت نقيب المهنسدين يوم قال ابعدوا عن الــ3 هندسات « الكميوتر..والاتصالات..والكيماوي»
• ابو يحيى: والله مانا عارف !
• العديل:خطيتك برقبتي..وديه على اوكراينا طب! سبع سنين وبرجعلك دكتور
• ابو يحيى: هيك رايك؟؟
ثم ياتي من ينقض فكرة «طب اوكرانيا» ويقترح ...هندسة الكهرباء موازي..ورابع يتفّه خيار الكهرباء..ويعود للصيدلة، وخامس يبدد خيار الصيدلة ويقترح طب اسنان....وكلما دخل أحدهم بعلبة «توفي» او بتنكة «شراب بودرة» ..رمى حيرة جديدة بعشرات اضعافها وغادر..
***
...وبقلّك ليش بيطلع الجيل «مهزوز» !!
"الراي"
