مش رايحة تفرق
أحمد حسن الزعبي
فوت جاي صاح أبو يحيى ل»جوز فزّة»..رغم أن جوز فزّة «فايت.. فايت» ولا حاجة لهذه الدعوة اللاحقة الا من باب إحماء الوجه ، رفع الرجل يده مسلّماً «الله يمسيك بالخير» ثم رمى باكوره على «الحصيرة» ليجلس ع الفرشة المقابلة..نظر أبو يحيى إلى يديّ ووجه ضيفه فثمة لمعة تشع من جلده تحت ضوء النيون ، ضيّق عينيه مرة أخرى ليتأكد مما يراه..
- أبو يحيى: شو مسوّي «بولش»؟؟
- جوز فزّة: مش سامع!!
- أبو يحيى: بقول «أديك ووجهك وصلّوعك بيرهجن.. بيلمعن» مسوي بولش!.
- جوز فزّة: لا والله دهنت حالي من «دهن القشب» هاظ القوزلين..هبّرني الزيتون واني أتشعبط سقا الله واحنا عاصرين..
- أبو يحيى: بعين الله..والله هاي ترويحتنا..هلكنا اليوم...ويا ريت محرزات طول النهار ع «رباطين»!.
- جوز فزّة: لدّ...خلي عندك خمس،ست تنكات مونة...بتدريش شو بصير بهالدنيا...هيك قالت لي فزّة...
أبو يحيى ناوله فنجان قهوة سادة ، ثم قذف «المكتة» بصورة زاحفة على الحصيرة فور أن رأى جوز فزّة يبحث عن باكيت دخانه...ثم قال وهو يمسح طرف الفنجان العائد إليه من الضيف بمحرمه ليخلصه من «الفازلين» اللزج...
- أبو يحيى: كله عند الله!.
- جوز فزة: بما أنه أولادك قرّايين وأنت طول نهارك بتتفرج ع المخسوف التلفزيون..فزةّ بتقول انه الحكومة ستتخذ قرارات صعبة جاية ع الطريق.. صحيح؟؟!
- ابو يحيى: وهو يلعق طرف سيجارة الجلواز قبل إشعالها: مش رايحة تفرق!
- جوز فزة: ها.. مش سامع؟؟
- أبو يحيى: مش رايحة تفرق
- جوز فزة: شلون مش رايحة تفرق ؟
- أبو يحيى: هسع راتب التقاعد قديش بكفيك!
- جوز فزّة: مش سامع..!!
- أبو يحيى: بقول راتب التقاعد تبعك قدّيش بقدّيك!!
- جوز فزّة: لثلاثة..أربعة الشهر.
- أبو يحيى: بعد القرارات الصعبة بيصير يقدّيك لواحد الشهر.. قالوا للقرد بدنا نسخطك قال أكثر من هيك ؟؟؟! ولّع حجّي ولّع وزتّ القدّاحة...