أوسع من هيك؟
أحمد حسن الزعبي
- شلاش : ع شو بتدوّر يابا؟
- أبو يحيى: ع الماخوذ..
- شلاش: المأخوذ بحرف الميم..مش بالصاد
- أبو يحيى: انطز واسكت..
- شلاش: في ظل حدا يدوّر بالدليل حجي..انت قلي ع شو بتدور واني بساعدك..
- أبو يحيى: بدور ع رقم صندوق النقد الدولي.
- شلاش: رن ع 1212 اريح لك.
- أبو يحيى: امسك بسماعة الهاتف الأرضي ،وضغط على الأزرار 1212 وبعد ان سمع ان هذه المكالمة مسجلة لغايات الجودة ،وان موظف الاستعلامات سيرد في الحال مشفوعة بموسيقى الانتظار.
- الموظف: معاك هاني كيف ممكن أساعد؟
- أبو يحيى: يا خوي رقم صندوق النقد الدولي إذا سمحت..
- الموظف: بعد لحظات انتظار ، ما اعتقد متوفر عندما خدمة ثانية..
أبو يحيى :مش متوفر عندكو..طيب اسمع بدي افش غلّي واحكي ومليح اللي اسمك «هاني» اسمع خالي هاني ، قريت هسع مكتوب بالجريدة : أنه مدير دائرة الشرق الأوسط وآسيا الوسطى في صندوق النقد الدولي، بيقول انه الصندوق أوصى بعملية الإصلاح الضريبي في الأردن من خلال «توسيع القاعدة» الضريبية..سمعت خالي «بده يوسع القاعدة»..أنت فاهم شو يعني شو بيصير فينا إذا «توسّعت القاعدة» عدم المؤاخذة...بس بقيت بدي اتصل عليه عشان أقله هالكلمتين .يا حريق الحرسي في ظل «أوسع من هيك» وسلامتك..
-الموظف: خدمة ثانية..
-أبو يحيى: سلم ع الوالدة..
-الموظف: نهارك سعيد شكراً لاتصالك..
-أبو يحيى: بتعرف تقول غطيني يا كرمة العلي.
-الموظف: عفواً..
-ابو يحيى: ولا شي ..سلّم سلّم..