بدّك تشوف!

جو 24 : احمد حسن الزعبي

لكثرة المراجعات ، والبحث عن التشخيص الصحيح اصبحت عبارة «بدّك تشوف»..عبارة عن كرة يتقاذفها كل مختصّ على الآخر..
في عيادة أخصائي المسالك أبو يحيى «مرتخياً» يميل رأسه جانياً على الكنبة دون حراك أو كلام أو طاقة : نظر إليه الطبيب مستغرباً من الحالة : من شو بشكي الحجي؟
• شلاش: من كل شي..!!سكري ، ضغط، انزياح فقرة، تجمع سوائل، ضعف عضلة القلب، عدم تفريغ للمثانة ، مي زرقا،الكلى نص ع نص، مراجعة ،أمساك ، قولون عصبي...
• الطبيب: عملتوا زراعة بول؟؟
• شلاش: عملنا ..وهاي النتائج!..
• الطبيب: في عنده التهاب بسيط..بس بعملش هيك «الرخاوة»!!..طيب شافه طبيب القلب؟
• شلاش: شافه!!
• الطبيب :شو قال؟
• شلاش: قال وضعه جيّد..ونصحنا نشوف دكتور مسالك!!..
• الطبيب: معناته بدك تشوف طبيب باطني!!..
في اليوم التالي أخذ شلاش الحجي الى عيادة الطبيب الباطني..وفي غرفة الأخصائي بقي أبو يحيى «مرتخيا» يميل رأسه على كرسي الفحص دون حراك او كلام او طاقة: نظر الطبيب الباطني مستغرباً من الحالة!!: من شو بشكي الحجي؟؟
• شلاش: من كل شي..!!سكري ، ضغط، انزياح فقرة، تجمع سوائل، ضعف عضلة القلب، عدم تفريغ للمثانة ، مي زرقا،الكلى نص ع نص، مراجعة ،أمساك ، قولون عصبي...
• الطبيب: عملتوا فحص التراكمي..
• شلاش: عملنا ..وهاي النتايج..
• الطبيب: التراكمي كويس والضغط مليح!!...حتى لو كان السكري والضغط مرتفعات او نازلات ما بعملن هيك ..طب شافه طبيب جراحة الكلى ..؟؟
• شلاش: شافه!
• الطبيب: شو قال ؟
• شلاش: وظائف الكلى جيدة..ونصحنا نشوف باطني!
• الطبيب: بدك تشوف طبيب أعصاب هاي مش شغلة باطني!
في عيادة أخصائي الأعصاب أبو يحيى «مرتخياً» يميل رأسه جانياً على الكنبة دون حراك أو كلام أو طاقة : نظر الطبيب اليه مستغرباً من الحالة : من شو بشكي الحجي؟
• شلاش: من كل شي..!!سكري ، ضغط، انزياح فقرة، تجمع سوائل، ضعف عضلة القلب، عدم تفريغ للمثانة ، مي زرقا،الكلى نص ع نص، مراجعة ،أمساك ، قولون عصبي...
• طبيب الأعصاب: عملتوا رنين مغناطيسي..
• شلاش: عملنا وهاي النتايج!.
• طبيب الأعصاب: صورة الدماغ كويسه..السائل حول الدماغ طبيعي..في أشياء قديمة..بس بتعملش هيك الرخاوة..طيب شافه طبيب الجلدية!.
• شلاش: شافه!
• طبيب الأعصاب: شو قال؟
• شلاش: قال الثالولة اللي بإصبع رجله الشمال كوسة..وبتعملش رخاوة..
• الطبيب: بدك تشوف أخصائي نسائية وتوليد...

• شلاش:نسائية وتوليد؟؟؟؟ بتعرف يا دكتور شايف لك أبوي (...) كل شي بيوجعه بس ما حدا عارف يشخصه!.