أبو قرشين
أبو قرشين نسيب أبو يوسف، متزوج أخت أبو يوسف الصغيرة شعشبونة، و بيكون كمان إبن إبن عمو.
أبو قرشين العصعوص اشتغل جابي ضريبه , و يلم فطرة رمضان ، و كمان عيدية المسحر في العيد الصغير، و كمان ماسك دفاتر حسابات كازيه القريه، يعني الزلمه حربوق و بيحب المصاري، و اي شغله الها علاقه بالمصاري مستعد يشتغلها بس مش ببلاش.
حتى لا اطولها عليكو، أبو قرشين كان و هو صغير يسموه (الاثنين ظاعو) و هاي من ورا القرشين اللي في جيبته و عمره عشر سنين , اللي سقطو منه و ظل يبكي اسبوع و يصيح (الاثنين ظاعو) و يبكي و يصيح ( الاثنين ظاعو) ، و لما زهقو منه , و أبوه مش فاهم شو الموضوع ، رقعو كتله مرتبه ، حتى فهم في الاخر انه قرشين (ظاعو ) من جيبته.
أبو قرشين العصعوص ، شفتو مره هو و شواربو الثخينه بيشتغل رقيب سير ، و نازل طقع مخالفات لاي سياره او حماره بتمرق من قدامه ، و ما بيخلصك منه الا اذا كان قابظ سياره ثانيه و بيحاسبها و انت مارق.
أبو قرشين اشتغل مره جمركي عالحدود اللي جنب قريتو، و يا حبيبي شو عمل في البحاره (البحاره هم الشفيرية اللي بتاجرو عبر الحدود) ، البحاره كانو يتشاهدو لما يكون مجاز ، ذبحهم أبو قرشين و هو إبن القريه اللي جنب الحدود و فاهم طبتهم (يعني كل افلامهم).
قبلها اشتغل أبو قرشين العصعوص كنترول باص كعمل اضافي، و عمرو ما فلت منو حدا، و عمرو ما رجع لحدا باقي، دايما ما في فراطه جوأبو لكل راكب.
الله لا يوقعك و تروح توكل في المطعم الي ماسك حساباته أبو قرشين كعمل اضافي، بيحسب عليك الاكل و الميه اللي غسلت فيها ايديك ، و يا ويلك اذا غسلت ايديك قبل الاكل و بعده ، و بيحسب عليك كهربة اللمبه اللي فوق الطاوله، و اتورط و اطلب ورق محارم ايدين، ولا ملح او فلفل اسود، بتوكلها و فاتورتك بتكسر الظهر من أبو قرشين.
و ما بدي اكمل و اقلك شو صار لما كان في المغادرين في المطار يقص تكت ضريبة المغادره، ايامها بطلت الناس تسافر، ولا لما اشتغل عداد كهربا يلف عالبيوت يقرا عدادات الكهربا او المي،. اما لما اشتغل في شركة الاتصالات اقرا السلام على جيبتك و راتبك. الله لا يوفقك يا أبو قرشين و لا ( الاثنين اللي ظاعو) و سولوك عقده من وانت صغير و نازل تنتقم من القريه كلها.
دير بالك تقعد معو عالقهوة و تسمعلو و هو بيسولف شو اهميته بالقريه، لو ماه القريه ماتت جوع، ماسكلنا سولافة انو الرجل الثالث فيها كلها بعد رئيس البلديه و الشاويش. و سولافة الناس كلها غيرانه منه ، فهاي معزوفتو هو و مرته ام قرشين.
و لما مره الغله اللي بيلمها انكشف انو سارقها و طردوه من الوظيفه، على طول فتح خشه صغيره للاستشارات الماليه و الضريبيه و يمكن ضريبه المبيعات، و بدا حبيبنا أبو قرشين هسه يلعب نفس الدور بس بالعكس.
شو يعني بالعكس . يعني كان مع البلديه ينظف جيوب اهلها , و هسع مع الناس حتى ما يدفعو اللي عليهم للبلديه .
هسه هو اللي بيرتب دفتر خرابيش مصاري الكازيه ميشان ما يدفع ضريبه و مكوس للبلديه، و نفس الشي للمطعم و كمان البحاره و بيدلهم كيف يتفننو بالتهريب، و كلو بحسابه.
باع كل خبرته في البلديه لاهلها ميشان يتهربو و يمزطو من الضرايب و ليش لانه بينزلها و بوخذ نص اللي نزله . برضو ميشان القرشين. ذبحونا (القرشين اللي ظاعو) منو وهو صغير عالجهتين ذبحونا.
مره بنتو ظيعت موبايلها و شكت في الخدامه انو سرقتو، و اجا شاويش القريه ، لما اشتكى أبو القرشين العصعوص، و الشاويش بيفتش في البيت لقا بيتو مخزن ، عشرين صندوق تايد و قدهم فاين و كمان خمسميت فلقة صأبون و اربعين كروز سجاير مهرب و سبعين كرت شحن موبايل و ميت جاريكان بنزين و عشرين عجل كاوتشوك سياره.
الشاويش فهم زي ما انتو فهمتو وين راحت بضاعة القريه، الشاويش نفخ و انتفخ وقال للعريف اخ اخ ، عرفنا وين بضاعة القريه اللي ضاعت، بس ما عرفنا وين (القرشين اللي ظاعو) و عقدت هالعصعوص.
هسا عرفنا لويش ام قرشين شعشبونه (مرت العصعوص) قطعت إهلها و ما حدا منهم بدخل عليها، و كمان اخوانو و خوات أبو قرشين و قرايبو و عدايلو ما بيقدرو يروحو لبيتو.
انسيت احكيلكو ، الشاويش وهو طالع ، سقطو القرشين من جيبة العصعوص أبو القرشين عالارض , و طلعو من وهو صغير و همو بجيبتو و مش (ظايعين) .
ولك القرشين طول هالسنين معك و انت بتصيح (الاثنين ظاعو ) ، الله اكبر عليك، اعوذ بالله منك يا أبو قرشين. و لك ظيعتنا مرتين، ظيعتنا و انته جوه و ظيعتنا و انت بره و رح تظيعنا لما تموت. الله يطول في عمرك بيكفي ظعنا مرتين.
(القرش عمله معدنيه في البلد تساوي عشر فلوس ، ولا علاقة لها من بعيد او قريب بسمك القرش و مثناه قرشين ، او القرش كوحدة قياس في مواد الكيف و المتعه و مضاعفته قرشين ) لذا اقتضى التنويه.
