بس دق الطبلة...
في زيارته الى صديقه ابو نعيم و اللي الله اعطاه من نعيمه وسكن في حي سفارات.
خاف ابو فهمي من استقبال ابو نعيم الناشف و الغاضب الو و هو زمان ما شافو.
قعدو في الحديقه و ابو نعيم قال للفلبينيه روحي سوي فنجانين قهوه بدون سكر. .... بدون ما يسألو شو تشرب و كيف قهوتك ... كالعاده. و طبعا ابو فهمي بيشربها حلوه و أخونا طلبلو بدون سكر.
وهم قاعدين سمعو صراخ و عويل في الشارع و مراكظه و بعدين صوت سيارات الاسعاف و صفير سيارات النجده، و التمت الدنيا كلها قدام بيت ابو نعيم. و ابو نعيم مش قادر يفهم شو في.
نط أبو الهمم حبيبنا أبو فهمي للشارع و دخل وسط الناس و شاف انو المشكله عند جيران ابو نعيم البعثه الاجنبيه المسؤوله عن تسفير الناس. و كمان استغرب انو اللي بيصيحو و ماسكين في باب البعثه و مش راضيين يتركوه. همو من اللي صارلهم سنوات بستنو بالتسفير لدول اوروبا و الدول المتقدمه الاخرى طلبا للملاذ الامن و المريح. الله يعينك يا ابو نعيم. اي كوم حجار ولا هالجار.
رجعو قعدوا في الحديقه يشربو القهوه البارده و يتنافخوا.
الله وكيلك يا ابو فهمي كل يوم زي هيك. كل يوم هزة بدن. و كمان مواقف بيتقطع قلبك الها. معتصمين على تأخير معاملاتهم. بس دق الطبله تيجي ميت هبله . مساكين بشوفهم جايين من نص الليل يوخذو دور ميشان فيزا ولا هجره.
بس بس يا ابو نعيم ، قرفتني عيشتي، اي بلا فنجان هالقهوه. بدي اروح على بيتي.
اقعد يا ابو فهمي، حقك علي و الله ما بتطلع اللا نتعشى سوى، وين رايح، اقعد.
اسمعي يا ميلندا، حظرينا عدة الشوي، بدي اتعشى انا و ابو فهمي يلا بسرعه.
شوي، هش و نش، كباب و شقف. ....... يا سلام هاي اول مره بيعملها ابو نعيم.
تشرب بيره يا ابو فهمي.
لا ما نته عرفني انا بصلي و ما بشرب كحول يا ابو نعيم.
افهمتني غلط يا ابو فهمي ، هاي بيره بدون كحول، عصير شعير يعني.
و سمعا صريخ و عياط و وزيطه في الشارع كمان مره.
والله ما نته متحرك من محلك يا ابو نعيم. اقعد ميشان الله بدي اشوفك. و شو راح يكون غير زي اللي قبلهم محتجين بس الله اعلم من وين لأنو صياح و برطمه غريبه.
اخيرا هف ابو فهمي ما استطاع من الكباب و الشقف و استأذن حتى يلحق اخر باص بلاش ينطس بتكسي يطلع اغلى من العشا.
ركب الباص و هوه يحكي مع حالو.
ابو نعيم مثل خبز الصاج امقلب على الوجهين.
الله يلعن هيك سكنه. و الله ما بسكن محلو لو يعطيني كل يوم عشر نيرات.
نسي حالو ابو فهمي في الباص انو ما بتمتم و انو قاعد بيحكي بصوت عالي و انو كنترول الباص ابو طاقيه مخزوقه سمع كل كلامو.
قلو الكنترول. انا مش معك يا اخ. وين العروبه. وين الشهامه. و ين الاخوه في الاسلام. و ين حق الجيره. احنا واجب علينا نقف معاهم و بدون ما نحملهم جميله. هاظا واجب يا اخ. ما عجبني كل كلامك. احمد الله انو ما بيصير عنا ايشي. و لو صار وين بدك تروح.
ابو فهمي صفن في وجه الكنترول تبع الباص وقال "ما ظل عالخم اللا ممعوط الذيل".
اسثغفر الله روح يا زلمه قص تذاكر و حل عني .
شفير الباص دعس بريك و قال لابو فهمي: اسمع يا اخ.... يا بتقعد باحترامك يا بتنزل من الباص. حكي في السياسه ما بدي اسمع. احترم حالك هاظا باص حكومه و بتحكي عليها.
صار للشرشوحة مرجوحة و لأبو بريص قبقاب. خليني انزل ... اي هاظا الشفير صابون نابلس ماايخلصك منه.
