غــراب عجّـــه ..

يا أبـــو عنـــاد.. فكرك احنا صرنا زي ألنعـــاب...
شو ألنعـــاب يا أبـــو فهمـــي.. هاي جديدة علي...
ألنعـــاب يا أبـــو عنـــاد هو فرخ ألغراب.. اول ما يفقس عن البيضه بيكون شحمه لونها ابيض بدون شعر...الغربان بتنكره وبتهجر الفرخ الصغير ..يعني ألنعـــاب...
الله معطي ألنعـــاب ميزة افراز عصارات تجذب الحشرات والديدان و بيتغذى عليها حتى لا يموت من الجوع..يعني رزقته على الله... وبيظل على هالحال لما يطلعلو شعر أسود و لونه بيتغير... وقتها بيظموه للسرب….
و الله انك فهمــان يا أبـــو فهمـــي..عجبتني هالسولافه.. لانها تماما احنا...
فعلا احنا زي ألنعاب.. رزقتنا على الله والمختــــار ما الو علاقه...
بننولد واهلنا بيربونا وبيطعمونا وبيقرونا و بيطببونا..ورزقتنا على الله...
بدّاينوه ميشان يودونا عالجامعات..وبيترجوا اللي بيسوا واللي ما بسواش ميشان يلاقولنا شغل..و رزقتنا على الله...
بترجو كل قرايب المختــــار ومجلس القريه والشاويش حتى نشتغل..وببيعوا اللي فوقهم و اللي تحتهم ميشان يزوجونا ويستأجرولنا غرفه نتزوج فيها...

**و يا فرحة ماتمت، خدها ألغراب وطار**...
كل هالتعب هي العصاره اللي بنفرزها حتى نجر الرزقه اللي كاتبها رب العالمين و ما نموت من الجوع...
*** والمختــــار غراب عجّه ***
ما الو شغله ولا الو دخل..قرفان من الزغب الابيض اللي على جلدنا...هاجرنا و مش سائل فينا...
اول ما يبدا الشعر الاسود ينبز على جلدنا .. هات يا حبيبي ظرايب وزرايب ولعانة حرسي و كل قرف الرفع اللي في الدنيا...وخاصه كلها بايد المختــــار اللي هو دليلنا...

ومن يكن ألغراب له دليلاً***يمر به علي جيــف الكلاب.......
لا طعميتونا واحنا خدّج وأول ما نبت الشعر .. بلشتو نتف فينا..

انا بعرف الاسود بتحمي قطيعها وبتروح تصطادلوه وتوزع بالعدل ألغنايم عليهم ...وبتعلمها كمان كيف الكر والفر و كيف تصطاد وتدافع عن نفسها.. ولما تحس انها تعلمت بتعطيها مسؤوليات ... يعني شغل... ولما تتزوج بتساعدها وبتظل دايره بالها عليها ... وشوف الولاء من الاشبال للقطيع مقابل هالرعاية..وشوف البذل والعطاء لمختارهم مقابل هالاهتمام وهالنشأه...

ايوه يا أبـــو عنـــاد .. بدك تقارننا بالأسود ولا ألغربان...الأسود انته بتعرفها وصفها ما بيركب علينا ... والغربان عندها أكبر حجم لفصوص دماغها بالنسبة إلى حجم جسمها بين كل الحيوانات اللي بنعرفها... والغربان لا تخاف لا من الصقر ولا من النسر...،

احنا و بكل فخر يالله يطلعلنا ألنعـــاب....وما بدي أزيد...
ليت ألغراب الذي نادى بفرقتنا *** عار ٍ عن الريش لاتأويه أوكــار...