منع من النشر || واللهِ واللهِ واللهِ..
كامل النصيرات
أن يظل المواطن طوال الشهر يحسب أنفاسه و يسأل نفسه ذات السؤال : يا ترى الحكومة ترفع وإلا ما ترفع ..وكم مقدار الرفع ..؟ هذا – لعمري- لعب بالأعصاب ..فالمواطن الذي صارت (تفرق) معه الليرة و النص ليرة (على بخاستهما) إلا إنه يعلم تماماً أن القرش الذي يذهب من الصعب أن يأتي بدل عنه ..!
و الله ملّينا ..ارفع ..لالا ..نزّل..لالا ..لفوق شوي ..لتحت شوي ..أيوااا هيك ..! يا عمّي سيبونا ..يا عمّي قرفنا حالنا ..ومش طايقين أواعينا إللي علينا ؛ بس مش رح نشلح ..نحكيها على الملأ و على رؤوس الأشهاد ..تخنتوها و ما خليتوا فيها ..!
الاقتصاد مش هيك ..و التوفير مش هيك ..وسياسة حبة فوق و حبة تحت مش هيك ..و التعاطي مع المواطن كمان مش هيك ..!! إحنا بشر يا جماعة ..بني آدمين ..لنا حواس ..ولنا طاقة لها حدود ..جيبنا ليس مغارة علي بابا ..و صحتنا على قدّنا..بل كل شيء عندنا على قدنا ..! ماؤنا على قدنا ..طعامنا على قدنا ..مزاجنا على قدنا ..وصبرنا على قدنا ..فارجوكم لا تشاركونا في هذا ( القد) ..لأنه انقد و انقد من دبر ومن قُبل ومن فوق ومن تحت ومن كل ريح ..!
الناس تضجّ ..لا أمزح ولا أبالغ ..فهل تشعرون ..؟؟ كل تبريرات الدنيا لا تقنع جائعاً بسرقة لقمته من فمه ..! والله (استوينا) ..والله كبر الخرق على الراتق ..والله والله والله – وما إلكو عليّ يمين – إننا نتعذّب كل يوم ..فارحمونا ..!!
kamelnsirat@yahoo.com
تابعو الأردن 24 على 
