حوار مع طبّال سياسي
لدّاد: طبّلي طبِّلْ
الطبّال: أطبّلّك على إيشْ ؟؟
لدّاد: طبلّي عَ الطبلة ..يا ابن الهبلة !!
الطبّال: وشو المُناسبة ؟؟
لدّاد: بدون مناسبة ..يعني التطبيل إلو مناسبة ..؟
الطبّال: أكيد لازم يكون فيه مناسبة ..والتطبيل بدون سبب قلّة أدب
لدّاد: ما البلد كل يوم فيها ألف طبلة وطبلة ..وما فيه عشرة منهم عندو سبب
الطبّال: كل واحد عندو سبب ..إللي قرفان ..بنطبّلّوا ..واللي فرحان بنطبّلّوا..وإللي زعلان بنطبلّوا ..وإللي زعلان مع مرتو بنطبلّوا..!!
لدّاد: وإللي زعلان من الحكومة ..؟؟ بطبلولوا كمان ..؟؟
الطبّال: لأ ..مش إحنا إللي بنطبلّوا ..الحكومة هيّ إللي بتطبلوا ..
لدّاد: الحكومة بتطبّل ..؟؟
الطبّال: وإحنا يا فِصِحْ من وين تعلمنا التطبيل ..؟؟من الحكومة ..!!
لدّاد: تحكي ومش خايف ؟؟
الطبّال: وأخاف من إيش ؟؟ ما هي مِشْ مخبية طبلتها ولا تطبيلها
لدّاد: بسْ أنا عمري ما شُفتْ الطبلة بإيديها ..
الطبّال: طبلتها مِشْ زي طبلتنا ..طبلتها قرارات ..وكل قرار يطبّل أعلى من الثاني ..
لدّاد: فهمتْ عليك يا عَرْصْ ..!!
الطبّال: لأ وفيه عندها قرارات بتهزّ هزّ ولا فيفي عبده ..
لدّاد: طيّبْ وشو غَرَض الحكومة من هالتطبيل والتزمير ..؟؟
الطبّال: إلها هدف واحد بَسْ ..تعطينا مهنة احتياط إن جار علينا الزمن ..!!
لدّاد: مِشْ فاهم ..
الطبّال: إذا طلعنا كلنا شعب طبّيْل وهزّيز ..ما فيه خوف علينا إذا ضاقت علينا الدنيا في الأيام الجايّة ..وهيّك شايف ..كل يوم الدنيا بتتغيّر ..وكل يوم خمسة ستّة من شعبك جاهزين للهز والتطبيل ..ومعهم احتراف في المهنة ..!!
لدّاد: يا زلمة قول و غيّر ..أي حكيك كبير ..وعلى هيك السلام عليكم ..!!
الطبّال: شو ..وين رايح ؟؟
لدّاد: رايح أدوِّرلي على منديل أحزِّم وسطي فيه عَ البدري ..!!!!!
abo_watan@yahoo.com
