من (أبو إِيْد)..إلى ( أبو رِجْل)..!!
منذُ بواكير صباه وهو يعوِّد يَدَهُ على لَطْش الأشياء ..لقد سرق أقلام رصاص ومحّايات وبرّايات أولاد صفّه ..وكان يأكلها و يُنَكّش بها أسنانه ..منذ ذلك اليوم وهو يأكل و ينكّش ..!! يده امتدّت وسرق خمس بيضات من خُم أُم جاسر..ويا ريته أكلهن ؛ كسّرهن وشَرَد..!!..وذات شجن ؛ تسحّب في عزّ الظهر ونفّض ( جيبات أبوه ) ..لم يبقِ شيئاً..لذا..فالكل خايف من يده .. أطلقوا عليه ( أبو إيد ) ..لن أقول طويلة ؛ مع إنها مناسبة لمَنْجقته..ولكنها لا تخدم نهاية الكلام ..ولن أقول أبو إيد ثقيلة ..مع إنها الأكثر توصيفاً ..ولكنها مُقصِّرة في حقّه ..!!
راح أبو إيد ..وجاء أبو إيد ..كبر أبو إيد ..دخل التسلسل الوظيفي ..ويده لا تترك بَعْبَشة إلاّ وترتكبها.. المهم ..قلتُ لكم دخل التسلسل الوظيفي ..شوفوا ما أرقّ تعبيري ..!! أنا كذّاب..لأنّ من اعتاد على الخطف والخفّة والنط والشط ؛ بالتأكيد لا ينفع معه أي تسلسل ..فقد صار مسؤولاً كبيراً ..كيف ؟؟ لا أدري ..بس سمعت أوّل مرّة من حلاّق إنّه سرق كرسيّاً.. وثاني مرّة حكالي ( مراسل بعرفش وين يشتغل ): انه سرق كرسيّاً..وثالث مرّة حكالي النقيب حازم إنه حرّر بنفسه محضر سرقة الكرسي.. ورابع مرّة ما حدا حكالي إشي ..بس صارت معروفة : أبو إيد سرّاق كراسي ..!! وإلاّ كيف وصل للّي وصل إليه ..؟؟
أمّا لماذا أحدثكم عنه ..؟؟ طبعاً من حقكم تسألوا ؟؟ وأنا حرّ إذا بدّي أجاوب بجاوب ..بس رَح أجاوب..هاظ يا حفيظين السلامة ..أبو إيد زَهْزَهَتْ معه الأمور عَ الآخر ..وصار مِشْ عارف وين يودّي المصاري ..لذا ..قرّر أن يخلّف ( وَلَدْ إزْغَنّنْ ) يسلينا فيه ؛ عن طريق الأنابيب ..ويقولوا وعلى ذمّة إللي سمع اليمين لمّا الزلمة حَلَف ..إنه ناوي يسمّيه ( أبو رِجِل ) بس مِش مسلوخة ..!!
إذا من أبو إيد وسرق نُص الكراسي وصار فينا إللي صار ..أبو رِجِل ( لمّا يْشَرِّف ) شو رَح يعمل فينا ..؟؟ والله ليخبِّط في إبْطونّا ..!! آآآآآآآآآآآخ يا بطني ..!!
abo_watan@yahoo.com
