سمعتْ آخر نكتة
كامل النصيرات
أبو فاعط: مع إنّو شعب كشري وجد زيادة عن اللزوم
لدّاد: بَسْ الضغط ضاغط ..والحكي فاعط
أبو فاعط: طيّبْ سمعت آخر نكتة ..؟؟
لدّاد: أيوه سمعتها ..
أبو فاعط: طيّب سمعني ..تَشُوْف
لدّاد : نكتة المعارضين لرفع الأسعار ..بيقولك ..إنهم عملوا مظاهرة وإللي أجو عليها كمشة بَسْ ..واحد من المشاركين في المظاهرة رفع يافطة طالب فيها بمساواة المعارضة بقرار رفع الأسعار ..!!
أبو فاعط: كيف ما فهمت ..؟؟
لدّاد: يا حمار يعني ..زي ما زدتوا الأسعار ..زيدوا المعارضة ..أمّا تزداد الأسعار والمعارضة تُنْقُص ..عيب بحق الوطن والمعارضة ..!!
أبو فاعط: ها ها ها ..الله يقطع شرّك ..بسْ النكتة إللي عندي أجدّ منها ..
لدّاد: وشو هي ..إلحقني بيها ..؟؟
أبو فاعط: بيقولك يا سيدي ..إللي رفع اليافطة اللي بتحكي عنها ..مِشْ مِن المعارضة ..من الموالاة ..من زلم الحكومة ..!!
لدّاد: ها ها ها ..لا يا زلمة أكيد بتتخوث ..يا ملوث ؟؟
أبو فاعط: والله زي ما أقولك ..
لدّاد: طيّب وشو إللي صار حتى يعمل هيك ..؟؟
أبو فاعط: قال بيقولوا إنّو الحكومة مِشْ معجبها المعارضة ..وإنّو حكيها زي حكي تبعين الحكومة ..حتى تبعين الحكومة أقوى ..عشان هيك طلبت من زلامها يعارضوا حتى يطلع قرار الرفع ديمقراطي ..وما يقولوا الحكومة قمعت الناس ..وهيك العالم كلّو بشوف أنو زينا زي العالم المتحضر ..فيه اعتراض على رفع الاسعار ..!!
لدّاد: طيّب ليش المعارضة ما عارضت عن جد ..؟؟
أبو فاعط: لأنّو المعارضة ما بتحب تكرّر نفس الخطاب إللي حكته قبل شهرين لمّا رفعت الحكومة الرفع الأوّل ..وقرار الرفع الثاني كان مفاجيء للمعارضة ..وما لحقوا يجهزوا خطاب جديد
abo_watan@yahoo.com
تابعو الأردن 24 على 
