فوائد الترفِّشْ ببطن المواطن

أولاً : المواطن بطبيعته قليل الحركة وهذا يؤدّي إلى جلطات وتكدّسات؛ وبما أن المواطن عزيز على قلوبنا، فإن الترفِّشْ ببطنه يساعده على تجنّب الجلطات والذي منّو..!!
ثانياً : الترفِّشْ ببطن المواطن يثبت بما لا يدع مجالاً للشك أن المواطن يشغل حيّزاً من تفكير إللي ترفّش ..وهذا ينسف كل الأقوال التي تدّعي أن المواطن ( ما حدا يفكّر فيه أو مش على بال حدا ) ..!!
ثالثاً : الترفّشْ عموماً؛ يعتقد كثيرون إنه إهانة ..وإذا سلّمنا بذلك ..يجب ألاّ نسلّم بذلك في حالة الترفش ببطن المواطن ..لأن الترفش في هذه الحالة فقط يعبّر عن كرامة المواطن الزايدة ..لأنو لو ما كان عندو كرامة كان ما حدا استجرى يحكي معو كلمتين مش يترفّش ببطنو ..!!
رابعاً : إذا قلنا ان إللي ترفش ببطن المواطن مسؤول كبير أو زغير مش مهم ..هذا يعني أن المواطن وفّر على خزينة البلد جزءا مهما من المصاري ..رح تسألوني كيف ..؟؟ أنا أقوللكو ..لما يترفّش المسؤول ببطن المواطن؛ رحْ تنظف كندرة المسؤول من كثرة الترفِّشْ وما رح ينظِّفها على حساب الخزينة وهيك يكون المواطن ساهم في الحفاظ على أموال البلد..!!
خامساً : لمّا يتم الترفِّشْ ببطن المواطن على الأغلب رح يبكي المواطن غصب عنّو ..وبكاء المواطن ضرورة لأن البكاء يوسِّع العينين ويغسّل العيون من الأوساخ ويشيل ( الدَّبَق ) في طريقو ..؟؟ وهيك بصير المواطن بشوف أوسع من قبل ويصير حليوة كمان وبدون كحلة يا سبحان الله..!!
سادساً : المواطن إللي ترفشولوا ببطنو رح يرجع على الدار ( إمْكَسْوَرْ ) وهيك رح ينام بدري ..وما رح يقدر يغازل زوجته..وهيك رح نوفِّر على المواطن احتمالية ( عيّل ) يتشكّل في تلك الليلة ..مما يعني توفير على المواطن التزامات جديدة ..!!
سابعاً : الترفش بالبطن سيحول المواطن إلى خبير في الحساب وخصوصاً العد ..لأن الترفش ببطن المواطن سيكون وقت الظهر ع الأغلب ..وهذا سيجعل المواطن يعدّ نجوم الظهر بعد أن يشوفها ..وهيك يصير لدينا مواطن شاطر بالحساب وما حدا يضحك عليه إذا ودّيناه على أي مطرح..يعني رح يشرفنا وين ما يروح..!!