كلّو ماشي بالنسيان

هل صحيح أننا أمة كثيرة النسيان ..؟؟ يعني ما فيش أي شي يلزِّق بدماغنا ..حتى مناظر الدم والأشلاء ؛ بعد ما نشوفها بشوية ننساها ..؟؟ معقول ..؟؟ طيب شو الدليل إننا أمة تنسى ..؟؟ يعني عشان إحنا ما نتحرك ولا نرد الضيم عن حالنا ؛ معناتو إنا بننسى ..؟؟ وإلاّ يا جماعة إحنا أمة ما بتحب الهوش و النوش ..عشان هيك بدنا نمشي الأمور و نعديها على خير ..؟؟
بس بدكو الصحيح ..إحنا أمة بتنسى عن حق و حقيق ..وعندي الدليل والأدلة ..هاظاك اليوم اشتريت اثنين كيلو خبز ومرّيت بطريقي على الدكنجي أشتري علبتين سردين ؛ رحت حطّيتْ كيس الخبز على الطاولة و تناولت علبتين السردين ..دفعت حقهن وظليت طالع ونسيت كيس الخبز على الطاولة ..!! معناتو أحنا أمة بننسى ..مزبوط ..مزبوط والله !!
طيب بلاش هاي القصّة ..هاذيك السنة ..أجا علينا مسؤول وقال بدو يعمل و يعمل و يعمل ..وقعد الزلمة ثلاث اسنين وأكثر وما عمل شي ..مش لأنو ما بدو يعمل ..لالالالا ..بس لأنو نسي يعمل ..وإللي ينسى مرفوع القلم عنو ..؟؟
طيب بلاش هاي كمان ...خذوا المثال التالي..فكركو ليش العرب انهزموا في حزيران في السبعة و ستين ؟؟..مش لأنهم ما يعرفوا يحاربوا ..ومش لأنهم شنوا عليهم الحرب فجأة ..ومش لأنو حصل خيانات زي ما يقولوا ..لآنو ( نسيوا ) كيف يقاتلوا ..ونسيوا الاسلحة في أرض المعركة ..!! فالقصة قصة نسيان يا اخوان مش أكثر..!!
أقوللكوا ..بلاش نغُمّ ونُنكِّد على بعض أكثر ..و خذولكوا هالنكتة عن النسيان : بقولّكْ فيه واحد نسّاي كثير كثير ..مرّة كان يركض قد ما تقول ..تعب من الركض ..فأراد أن يأخذ نفساً ويرتاح ..فتوقف عن الركض وركع وحط إيديه على ركبتيه ليأخذ نفسأ..ولمّا رفع يديه واستقام نسي ما كان يفعل؛ وبدلاً من أن يواصل الركض ؛ قال : سمع الله لمن حمده ...وواصل الصلاة ..!!