قرض مصلّب
م. أسعد البعيجات
جو 24 :
كانت اصعب ايّام حياتي ايّام الصغر انه يكون في عملية صيانة في البيت، فك، تركيب او تنظيف. هذه العملية بحاجة إلى توفر صندوق العدة للقيام بهذه الأعمال.
وكانت اصعب اللحظات انه ابوي يطلب مني مفك او شاكوش او زرادية والتعقيد الأكثر مفك مصلب او مبسط.
يا حبيبي، في هذه اللحظة أحس بدوار شديد من الدرجة الثالثة ( على قولة الأرصاد الجوية منخفض من الدرجة الثالثة ) وأحس الكرة الأرضية صابها هزة .
من وين اجيب مفك الان ووين الاقيه ... طبعاً بدك تحوس الدار حوس وما تخلي جرار ولا رف للبحث عن المفك المصلب او المبسط حتى فتحت الثلاجة ابحث عنه.
المشكلة انه اخر مرة استخدم ابوي المفك المصلب وبعد ما خلص شغل فيه اعطانياه وقلي رجعه يا "أبوكشة" على صندوق العدة .
طبعاً محسوبكوا لا رجعته ولا ما يحزنون . ضليت العب فيه وبعدين الله اعلم وين صارت أراضيه . واكدت لأبوي اني رجعته على صندوق العدة . الان أنمسكنا وما في فرار ورح أضطر اروح على دار جيرانا ابوفراس اشوف اذا في عندهم مفك .
طبعاً احتمال انهم دار ابو فراس يعطوني مفك ضئيلة جداً،
كوني صاحب أسبقيات ،
أخذت من عندهم مرة شاكوش وضيعته
ومره أخذت سلم رجعته مكسور
ومره أخذت فأس وما رجعته
وكل يوم بحكيلهم اليوم وبكرة .
المرة هاي عندي آمل انه يطلعلي ولد صغير من الأحفاد مش عارف تاريخي السابق!!!!!
في الأفلام الامريكية ، تجد ان العدة عبارة عن علم واسع عندهم ، كراج السيارة او التسوية تلاقي العدة فيها مصفطة مثل مرطبنات النوتيلا .
تجد كل ما يلزمك من عدة ومستلزمات صيانة البيت وكأنك في مكتبة.
الله يجزيهم الخير الصينيين، لما تشتري اَي قطعة اثاث بحاجة الى تركيب وتجميع ببعثوا العدة معها، مش بحاجة تبحث عن مفك ولا زرادية الله العليم انه صاحب الفكرة ينحدر من عيلتنا وحب يساعدني في معاناتي ويختصر عليّ البحث.
مش عارف ليش تذكرت المفك المصلب وصابني صداع من الدرجة الثالثة لما اسمعت انه الرزاز اخذ قرض " مبسط " بقيمة مليار و ٢٠٠ مليون دينار من البنك الدولي !!!!!
كيف البنك الدولي وافق على القرض مع انه ملفنا كله أسبقيات من الدرجة التي لايشملها لا عفو عام ولا عفو خاص!!!
الحلو في الدولة عندنا كل مرة ببعثوا للبنك الدولي واحد
مره البخيت
ومره الروابدة
مره النسور
ومره الملقي
ومره الرزاز ،
ما بنعطي مجال للبنك الدولي يعاتب الي جاي يوخذ القرض بالقول :
" انت مش أخذت قرض المره الماضية؟ ".
تابعو الأردن 24 على 
