معاذ..بدي احكيلك سر
فيصل عويد المحارمة
قاعد يوكل ويشرب معانا ... حاسينو عايش بيننا ... اسمو بتردد بدارنا اكثر من اسمي ....وللعلم بطل حدا يحكي معاذ الكساسبه الكل بيقول بس معاذ ... لانو من اهل الدار ...واعز ... ومش بس دارنا .
معاذ الو 6 ملايين اخ واخت والو 3 ملايين عيله بالاردن وانا متاكد كمان انو الو اهل بالشارقه وعجمان والو اخوان بالرياض ولك حتى تورا بورا تعطرت جبالها بسيرة هالبطل . وبسكرامانتو... بامريكا هلت دموع الحزن عليه .وفتحولوا بيت عزا... الله اكبر ياهالمعاذ شو نصيبك حلو وشو موتك مشرف .
الله اكبر كم مليون انسان اترحم عليك وكم مليون صلى عليك و ذرف دمعه حزن والم . الله اكبر كم الك ام ...وكم الك ابو .
نفسي امي تترضى علي قد ما اترضت عليك. ..قد ما بكت ..قد ما دعت .. ومش بس امي .
يا روح معاذ سلمي على معاذ واحكيلو انو ريحة الارض اللي اندفن فيها صارت عنبر وطيب ...
واحكيلو ان كل الارض بتتمنى تحضنك وتضمك
احكيلو انو صار مثل الشيح والقيصوم والزعتر
وصار علم وصار كتاب وعنوان وقلم ودفتر وصار رمز النا .. ومش بس النا .
يا روح معاذ بدي احكيلك سر ... انا بغار من معاذ . ومن سيرة معاذ ومن شهادة معاذ ورجولة لازم تتدرس بالمدارس ...ووقفة اسد رح يحكيها التاربخ
.. نعم بغار من معاذ ...ومش بس انا...
باغار من بطل صار ابن كل العشاير والحمايل وصار ابن البلاد كلها . ابن سحاب وعمان وابن القدس وابن البحرين... ومش بس الكرك
يا روح معاذ سلمي على معاذ وسلمي على ملوح واحكيلو سيرتك مثل المسك بتفوح
واحكيلهم ان الرجوله هي اللي مخلده بالذاكره والجسد بيفنى ويروح . واحكيلو ان الارض تزلزلت من تحت كلاب داعش والسما اتفجرت ... والنار الاردنيه ما رح تنطفي ... ومش بس الاردنيه .
تابعو الأردن 24 على 
