ابو سمير

جو 24 :

رن تليفوني ( ابو اللوكس ) الذي لم يصنف من فئه الهواتف الذكيه بعد . رغم كل الواسطات المبذوله .ورغم كل ما يحمل من شهادات وامكانات كبيره مثل شهاده الكفاله وشهاده الصنع ورغم اللوكس والآلة الحاسبه والساعه الديجتل الا انه ما زال في نظر العالم غبي !! . ما علينا مش هاظ موضوعنا رغم اني حزنان على الظلم الواقع عليه الا انو مش هاظ موضوعنا . اقول رن علي العم عبد الوهاب جرادات وكان معصب وزعلان على غير العاده .
وقال لي فورا . وك ابن عويد فقمت من مكاني ووقفت وقفه عسكريه وقلت نعم عمي ابو سمير
قال وك ليش ما ترفش ببطن الحيتان .
حاولت ان امتص غضبه واخفف دمي وقلتلو بسرعه . ما احنا معناش حيتان عمي هههههههه اصلا معناش بحر يزم . كلها شقفه هالشط بالعقبه يا دوب يسع اكمن سمكه .
قال لي .اسمع انت بس شاطر ترفشلي ببطن الحكومه عشانها ساكته عنك واخذتك عقد عقلك . خليك (زغرت) وارفش ببطن الحيتان اللي طعمونا ***. اشي اغذيه فاسده . اشي ادويه مقلده . قطع سيارات مزوره . لحم مضروب . جرار غاز معطوبه . وك حتى الشامبو عطبوه .وك بطلنا نقدر نعيش. وبطل النا فرصه بسوق العمل . وك بتهربوا من الضرائب. وبدفعوش كهربا ولا مي يزم اكلوا الاخضر واليابس وبالاخر تقع بروسنا ورؤوس واولادنا . ارفش يزم ارفش وانا بدي ارفش معك .

بصراحه اول مره بشوف المختار بهاي الحاله عشان هيك انخرست وما قدرت احكي واصلا ما عندي جواب .

يا عم ابو سمير احنا لو شايفين الحيتان بعيونا كان اكلناهم بدون طبخ .
لو نقدر نوصلهم كان خلينا اللي ما يشتري يتفرج . كان عصرنا كل قرش اكلوا بالحرام . بس انا يا مختار كل سلاحي هو عباره عن بسطار 44 من الباله قاعد ارفش يمين ويسار ومش ملحق . سالفه الحيتان بدها رفش جماعي بدها وعي من المواطن لازم يعرف حقوقو ويعرف واجباتو عشان يقدر يرفش . يعني يا عمي ابو سمير شو خلا الحيتان يصيروا حيتان . غير سكوت السمك عليهم .على سبيل المثال عمي شو خلى الحيتان يستوردوا العاب ناريه غير انو المواطن مدمن طخ . ومش بس طخ . خليها على الله غلب بستر ولا غلب بفضيحه.