عند عمك طحنا

وزارة ال*****و******ترحب بكم اذا كنت تعرف الرقم الفرعي المطلوب ادخله الان او اضغط صفر للتحدث مع مامور المقسم .
طبعا ادخلت الرقم الفرعي ما حدا رد . فقمت بادخال رقم فرعي اخر . وعند عمك طحنا (وعمك طحنا هي عباره تقال عندما تشعر ان جهودك ذهبت ادراج الرياح ) . رقم فرعي ثالث و رابع وكمان ما حدا رد . ... !!!!
بعدين بلشت افكر (ويكفيكوا شر تفكيري) . صرت احكي مع حالي واقول وك معقول اليوم الجمعه . ؟ اكيد لا . اليوم الاثنين . طب بلكي اليوم عطلة رسمية مهي بالاردن مفيش اكثر من عطلنا واعيادنا . عيد الشجره وعيد العامل . والام .والاخت والاستقلال والجيش ....الخ .
اكيد لا.... لو عطله كان عطلوا اولاد المدارس . !! لعاد شو القصه ؟ . بلكي وقت صلاة . والوزارة كلها بتصلي جماعه والوزير هو الامام مثلا .؟؟؟

بعد شوي رنيت كمان مره ونفس الشي كل الارقام الفرعية ما بترد . ففررت اكبس صفر واحكي مع مامور المقسم . وظل التليفون يرن وبرضو عند عمك طحنا .

هون كبرت السالفة براسي وقلقت كثير عالجماعة . وبلش الفار يلعب بعبي . خفت تكون ضربتهم الكهربا او يكون صار عندهم تسرب غاز مثلا .

يا ربي شو اعمل ؟ احكي مع الدفاع المدني ؟ ابلغ الشرطه ؟ ؟؟؟ ... بعدين قلت وحد الله يزم اكيد المانع خير . بلكي الوزاره راحت تطل على واحد مريض . او طلعت تقوم بواجب مثلا . اصبرلك شوي ورن كمان مره . بعد نص ساعه رنيت مره ثانيه على كل الاقسام ونفس الشي ورجعت رنيت عبى المقسم وبعد طول انتظار ولله الحمد رد علي عامل المقسم . ولكن هل تعلمون ماذا رد علي بعد طول انتظار . بدلا من ان يقول . الو . او مرحبا . او نعم . ؟ لقد قال (ها) !!!!!!!
اقسم ان ال (ها) كركبتني جدا وما عرفت شو بدي احكي . فقلت بتردد يعطيك العافيه يا طيب .ولا مواخذه انتوا وزاره الهيك وهيك . قال نعم يا اخي تفضل . قلتلو يزم في واحد برد عالناس عالتليفون بحكيلهم (ها ) ؟؟؟؟؟؟
يزم ليش انتوا هيك . يزم انا المواطن اغلى ما تملكوا انا المواطن يا ناس يا هووووووو ليش هيك بتعاملوني . انت بتاخذ راتب عشان تحكي للناس (ها) . عكل حال المكتوب مبين من عنوانو خيو . اذا انت عامل مقسم بتقولي (ها) الحمد لله انو الموظفين ما ردوا علي . كان حكولي اشي ثاني . خيو انا كنت بدي منكو شغله لاني فكرتكو بخدمه الوطن والمواطن بس ما دام هيك القصه وكل واحد بغني على كيفو وبطل في ضبط وربط وبطل الموظف يرد عالتليفون عشان ما (نقطع لنصو) اذا شابك عالفيس او (****) كيفو اذا قاعد عالواتسب . وبطل في حميه وحماس للعمل وبطل في خوف من الله . فانا بطلت بدي منكو اشي . الله لا يخلف عليكو . تعب قلبي وانا ارن عليكم وهسع جاي تقولي (ها) . سنحك .