رفشة بطن / مجنون يحكي وعاقل يسمع

كهربني خبر  يقول ان الملكيه عينت مديرا تجاريا اسمه بول براتب 24000 دينار اردني شهريا .
في البدايه تكركبت من عدد الاصفار .وبطلت اجمع .وشعرت وكأن الضو انطفى فجأة وعتمت الدنيا بوجهي .

لكن بعد ما هديت شوي وامتصيت الصدمه بدأت افكر وانا للعلم من النوع اللي ما بحب التفكير . انا لا اعترض او اتدخل في شغل الملكيه شو خصني بالملكيه هم حرين بقراراتهم .وهم ادرى بالصح
ولكن مجرد قراءة الخبر اصابني برجفه في المشاعر وانزلاق حاد في التفكير ادى الى اصابتي ب (هبال مؤقت متوسط المدى) والنتيجه عدة تساؤلات بريئه جدا عصفت براسي كما عصفت اليكسا باشجار المدينة الطبية. 
اولا كيف يستطيع السيد بول ان يعد هذا المبلغ في مطلع كل شهر ؟ سؤال محير .
انا لو كنت مكانه كنت رح انادي اخواني واولاد خواتي وعدد من الاصدقاء الموثوق بهم عشان نقدر نخلص عد المصاري بيوم واحد

تاسعا. بالصلاة على النبي ان يومية السيد بول هي 800 دينار اردني يعني قد راتب مهندسين اثنين (باليوم) . يعني ان راتبه بالشهر يساوي راتب 60 مهندس اردني . طب يزم (والحكي للجميع ) معقول ما في اردني بقدر يشتغل مكان بول؟
طب بلاش اردني واحد يعني لو جبنا خمسطعشر مهندس اردني واعطيناهم هالمبلع يا هل ترى ما بسدوا مكان الاخ بول .؟

سابعا . كم احتاج انا لتحويش هذا المبلغ ؟
بحسبه بسيطه انا بحاجه للعمل 231 ساعه باليوم لمده 15 سنه ضوئيه . مع عدم الصرف نهائيا كي احوش هذا المبلغ .

رابعا طيب ماذا يفعل الاخ العزيز بول كي يحصل عليه في 26 يوم عمل اذا افترضنا انه يعمل يوم السبت ؟ واربعه وعشرين يوم اذا كان يعطل السبت .

واخيرا وهو السؤال الاهم الذي شل تفكيري وكركب مخيخي وشطف خلايا دماغي هو . ماذا استطيع ان افعل انا لو كان راتبي 24000 دينار بالشهر .
ساشتري كل يوم لحمه بلديه وفواكه . اه فواكه من الغاليه كمان .
ساصلح ايبادات اولادي كل يوم ولم اعد مظطرا لسمط راكان كف كلما اخبرني ان الايباد خربان .
ساشغل المكيف بغرفة الاولاد ليل نهار ورح ابطل اخذ مميع دم كل ما اشوف جابي الكهربا .
رح اعمل كل اسبوع (بر الحبايب ) واعزم عماتي وخالاتي . ورح اصلح سماعات الجامع اللي بحارتنا ويمكن اشتريله نظام صوتيات جديد. وبعدين رح انزل على سوق الجمعه كل يوم خميس بالليل وابرطع بالتسوق من هناك . او ليش سوق الجمعه بدي اروح اشتري من عبدون . اه من عبدون. بس ما باعرف اذا اسواق عبدون بدها فيزا والا بدون ؟ .. مش مشكله بنجرب واذا ما زبط عادي بارجع عالعبدلي .

رح اركب شبابيك عازل للصوت وخلي الحداد والبنشرجي اللي قبال البيت يشبعوا شغل بالنهار والليل بدون ما انزل كل شوي (اتناقر معاهم ) وبالمثل بكمات الخضار والغاز ... يا سلاااااام تخيل حالك بتنام خمس او ست ساعات بالليل دون ما يصحيك صوت ما من بره البيت . كم هو رائع هذا الشعور . ولعلمكم يمكن اقدر اقيلل الظهر كمان .....
كل هاظ والمبلغ لم ينتهي ... يالله كم هي كبيره وكثيره هذه ال24000 دينار بالشهر . كم تمنيت لو انها ل مفلح مثلا او لعبد الفتاح او حتى ل غالي الطبره . عالاقل غالي كان رح يصرفهم جوا البلد . وبكل تاكيد رح يصلح سماعة الجامع
تقبلوا امنياتي لكم جميعا ب24000 دينار شهريا لكل منكم.