رفشة بطن/ يا هملالي
عزيزتي الحكومه اضع بين يديك هذه القصه
ال (ب) ال(أ) هو دائرة حكومية في سحاب مكتوب على بابها ادفع الباب . دفعت الباب امتثالا للاوامر ودخلت . لم يكن هناك احد . بحثت داخل المكاتب ولم اجد احد . ناديت وقلت مرحبا . في حد هون ... ما حدا جاوب . تابعت البحث تحت المكاتب وخلف الابواب ولم يكن هناك احد فخرجت اسأل صاحب الدكان المجاور فقال (اسع بتلاقيها قاعده عند (العمو) تبع المكتبة.
وفعلا كانت هناك . وسألتها انت موظفة الموظفه . قالت خير شو في . قلتلها ولا شي بس بدي ادفع الفاتوره قالت روح استناني بالانتظار هلا باجي .
انا متأكد انها حكت هالكلمتين من خشومها مش من ثمها .عادي جمطناها ومشينا ورحت وانا مقموع ومكسور الخاطر الى صالة الانتظار حيث لا يوجد احد .وجلست انتظر.
بعد شوي اجت (ستنا) الموظفه . وهي (بتنافخ ) و(بتتاف اف) وعلى ما يبدو اني قطعت عليها حوارا جميلا مع العمو تبع المكتبه . المهم .لفت ستنا الموظفه خلف الكاونتر و دار بيننا الحوار الاخوي الوحدوي التضامني التكافلي التالي :
الموظفه خير شو بدك ؟
انا . ولا اشي بس بدي ادفع الفاتوره .
الموظفه. اووووف انتوا ليش ما بتيجوا مع بعض مرة وحده وبتخلصوني .. انتوا ما (بتزكروا) (بالزين) الا لما الواحد يطلع بره عشان يتنفس. اوووف شو هاد .
انا. اسف ستي حقك علي باوعدك الفاتوره الجايه رح انزل اعلان بالجريده واقول اللي بدو يدفع فاتورتو لازم ينسق معي عشان نروح ندفع كلنا مع بعض يا جماعه عيب ما بيصير المواطن يثقل دمو عالموظفين وكل شوي يجي واحد لحالو . خلينا نروح كلنا مع بعض ندفع فواتيرنا مرة وحده ونكون مؤدبين وما نقطع سواليف الموظفه مع العمو .
الموظفه شو حضرتك تفضلت ليكون بتتخوث مثلا . انت مش عارف مع مين بتحكي؟؟؟
انا ... يا لطيف .. يا لطيف اسف ستي اصلا انا المواطن المقموع لازم اظل منطم ليروح تطلعي بنت واحد معالي وتودينا بداهيه .. حقك علي والله . منك السماح . تفضلي هي الفاتورة خليني ادفعها (وافل من وجهك ).
مسكت الفاتورة براس اصبعها وقالت (تمنيه وتلاتين ) فناوشتها خمسين .
فقالت . وكمان عاملي فيلم هندي وانت ما معك فكه . ؟؟؟؟ روح جيب فكه وارجع بسرعه انا ما باشتغل عندك فاهم ؟؟
انا . طبعا فاهم . مش انت موظفه حكومه . يعني اكيد لازم اكون فاهم . بافهم بكيفي احسن ما البس قضية اعتداء على موظف اثناء تأديه واجبو . يا عمي ارنب سعيد ولا اسد تعيس المهم دورت فراطة ورجعت عليها لقينها مسكره المكتب ومروحه . والساعه ما زالت يا دوب الواحده ظهرا .
عزيزتي الحكومه ممكن سؤال لو سمحتي.
انت متى سجلتي الدوله باسم اللي خلفوا الموظفه ؟ ومين اللي فهم الموظف الحكومي انو احسن من المواطن العادي.؟
عزيزتي الحكومه ....... . ......
