صرخة دفينه
![](https://jo24.net/assets/writers/images/1d595ba5c66f74940a8634765dff82df.jpg)
إن المشاهدات اليومية للسلوكيات الاجتماعية التي يتبعها البعض تجعلك تشعر وكأنك تعيش وسط مجمع للأمراض النفسية هذا مع العلم أن آخر تصريح صدر عن قسم الامراض النفسية في المدينة الطبيه وكان مفاده ان اكثر من مليون اردني يعانون امراض نفسية اي ما يعادل 17% من مجموع عدد السكان .
اليوم دعوني أضع بين أيديكم بعض المشاهدات التي سأحاول أن أفسرها لكم لاحقا واسمحو لي أن اقولها بلسان الحال ،" لما بتشوف شباب بقعدوا بأرقى الأماكن وأول ما يجلسوا بطلعوا التلفون ومفتاح السيارة وبحطوهم على الطاوله مع العلم أنهم ميتين من الجوع بس بحاولوا يظهروا انهم اغنياء " و" لما بتشوف فتاة معبية وجهها مكياج ولابسه لبس ولا افيع من هيك مع العلم انه هذا مش ستايلها بس عشان تحس حالها حلوه " و " لما بتشوف مدير بصرخ على الموظفين بمجرد ما شاف ناس كثيرين متواجدين بالمكان عشان يحكي للاخرين انه مسيطر " و " لما بتشوف شباب و بنات بعلوا بأصواتهم عشان يسمعوا اللي حواليهم ويلفتوا الانتباه عشان يوصلوا رسالة انهم مثقفين او بفهموا " و "لما بتشوف واحد نافخ صدره وماشي وكأنه مش سائل عن حدى عشان يقول انه قوى " و " لما بتشوف شباب طالعين بسيارة ورافعين صوت المسجل عالي عشان يوصلوا رساله للآخرين انهم فرحانين " و " لما بتشوف شباب بعلقوا على الرايحه والجايه والالفاظ مشا الله كلها ألفاظ سوقه عشان بس ياخذوا نظرة او كلمه من أنثى" و " لما بتشوف شب صار يدخن او يأرجل بمجرد ما دخل الجامعه عشان يوصل رسالة إني كبرت " و" لما بتشوف واحد قطع الاشارة حمرا قدام الكل عشان يحس حاله انه رجل " و" لما بتشوفوا واحد عامل حاله مثقف بكل شي وبحكي كثير وما بعطي حد اي مجال يحكي كلمه عشان يقول انه فهمان " و " لما بتشوفوا واحد بياكل بأظافره بدون ما هوه نفسه يفهم سلوكه" و " لما بتشوف رجل كلامه ولا أسواء من هيك وبسب على زوجته وليل نهار أوامر كأنه جنرال في جيش عشان يحكي انه زلمه " و " لما بتشوف واحد أول مايقعد معك بحكيلك أنا أبوي فلان وجدي فلان ومن عشيرة كذا وكذا عشان يحكي انه واصل بالبلد مع انه الحديث ماكان في هذا السياق " و" لما بتشوف واحد بضخم كل الأحداث عشان يشعرك انه بعرف ناس واصله أو هوه اله قيمه " و"لما بتشوف واحد بسوق بسرعه جنونية وتشحيط ليل نهار عشان يحكي انه سائق محترف " وكثير كثير من السلوكيات اللي بنحط عليها الف او مليون علامة تساؤل وتعجب ؟؟!!!!!!.
بخبرتي المتواضعه اقول إن السلوكيات التي ذكرتها سابقا ناتجة عن "الصرخة الدفينة" التي أراد أن يطلقها جميع من انطبقت عليهم الأمثلة لكي يقول لكل من حوله "إني موجود" وهي أيضا صرخة القهر ونقص الثقة التي وجدت في العقل الباطن وفسرها السلوك دون أن يفهمها الشخص ذاته والآن اسألوا أنفسكم هل انتم هنا أم بحاجة إلى أن تعيدوا ترتيب هيكل بناء الشخصية لديكم ؟؟؟؟؟ !!!!!!!!!!