رفشة بطن/ احفر واربح

عزيزي المواطن الاردني شو يعني ان يكون كيلو الكوسا بدينار ونص ... عادي ... وعادي ايضا ان تكون بكسه الخيار( بطنعشر دينار ) .... ما عليك عزيزي المواطن الا تشغيل مخك قليلا حتى تتجاوز الازمه بسلام

اتبع الخطوات التالية 
لا تشهق او تصرخ اذا طلبتك زوجتك (اثنين كيلو بطاطا للغدا )... تماسك ... لا تسمح لعلامات الذعر بالظهور على وجهك ... وتصرف كأن الوضع عاااادي جدا ثم ابتسم وقل لها ... امرك يا حياتي ... رح اجيبلك من البطاطا تبعت احفر واربح ... تلقائيا ستسألك زوجتك .. شو هاظ احفر واربح ... فتجيب انت ان حمى المسابقات قد طالت الخضار في الاردن وداخل كل حبه خضار هناك ورقه ملفوفه مكتوب عليها اسم الجائزه .. يعني ممكن تربح كيلو كوسا مجانا عند حفرك حبه كوسا ويمكن يطلعلك صورة السيد عبد الله النسور عند تقطيع حبه بطاطا ... ثم تاخذ نفسا بسيطا وتقول ... ومعاها برواز مجانا كمان .... تلقائيا سيصفر وجه زوجتك وتصيح ... لا لا يابو غالي شو دولتو وما دولتو انسى بلاش بطاطا ... اصلا البطاطا مش زاكيه ... يزم قبل شهرين اكلنا بطاطا .. هي سالفه ؟؟؟؟
.... انت الان سيد الموقف .. قم بتوجيه الضربه القاضيه كالتالي
قل لها طيب حبيبتي شو رايك اجيبلك زهره ... او بيتنجان احسن ... بيقولوا البيتنجان .. بيربح (سي دي ) اسمو 70 % وهو يحتوي تسجيل صوتي للقاءات دولة الرئيس مع المحطات الفضائيه .. مرة اخرى ( ستصيح زوجتك )( تف من ثمك يزم وك مالك على هالصبح ... وك الناس بتتصبح بالخير وانت بدك تصبحني بدولتو .... بدناش خضره خلص اصلا الخضره بتساوي كآبه ...... اقولك ... بطلت اطبخ خلص بنتغدى من طبيخ امبارح ...
الف مبروك عزيزي الزوج ... لقد انتصر ذكاؤك على اطماع زوجتك .. لقد وضعت حدا لبطرها وبعزقتها ومصاريف كماليات ما الها داعي ... قال بطاطا قال ... شي غاد..

هناك امور اهم تتربص براتبك اولها الكهربا والغاز والكاز والطبيب ومصروف المدرسه وبنزين السياره وايجار البيت وقسط الغساله ومنداري ايش ولم يعد هناك مكان للكماليات في راتبك .... عزيزي الزوج .. ودع البطاطا والخيار والبتنجان وملحقاتها وضمها الى قائمه التفاح الامريكي والكستنه التركيه واعلن مقاطعتها ف ( اللي معهوش ميلزمهوش ) عليك بالاشياء المتوفره .مثل ورق شجر التين . اكواز الصنوبر. اغصان السرو. جذور التوت اه عادي ... جذور التوت ... اصلا زاكيه مع الماجي بهذه الخطوات تكون قد وفرت راتبك ثم كسبت رضا زوجتك لعدم اسرافك . وبالمره فقط حافظت على رشاقه جسمك .
احبكم