موزنبيق وقطار عمان العقبة
ليلة الجمعة نجتمع مع مجموعة من الاصدقاء للسهر وامضاء وقت جميل ويتخلل السهرة لعب ترفيهية من تركس و طرنيب ، يتم تحضير مستلزمات السهرة من ترمس بشار بزر عين شمس شاي ، وفي الشتاء سحلب و حلب وعوامة ، طبعا لما نكون قابضين نشتري عشاء فاخر على الاخر . .
السهرة تبدأ بالهرج والمرج واصوات القهققة تشتعل ، وتبدأ السواليف والقصص والحكايات ، في منتصف السهرة قلت خليني اسولف مع الشباب سلافة لترطيب الاجواء .
بصراحة انا لما اسولف بنسى نفسي وبزيد على السلافة بهارات وخلالفه طبعاً الشباب بعرفوا انه انا زلمة عريط بس بمشوها حتى يتسلوا .
بلشت بالسلافة وقلت بتعرفوا يا شباب الاسبوع الماضي انزلت على العقبة مع الشغل و انزلنا بفندق خمس نجوم ، بس شو يا شباب اشي من الاخر فطور غذاء عشاء ساونا جاكوزي برك سباحة غرف رياضية اشي من الاخر ، وبتعرفوا مين لاقيت هناك وتعرفنا على بعض واخذنا ارقام بعض وصرنا صحبة قالوا مين ، قلتلهم مش رايحين تصدقوا ، قالوا يا رجل احكي وخلصنا .
بعد ما اخذت نفس عميق ومع بعض القهققة حكتلهم الشوالي وقف واحد قال المعلق تاع الجزيرة قلتلهم طبعا ، الشباب عرفوا اني انا عريط بس مشوها ولكن صديقي ابو غضب سألني كيف ذهبتوا للعقبة بالسيارة ، وبطريقة ساخرة وبنظرة فوقية ومع غمزة عين قلت اطلعنا بقطار عمان العقبة من السابع للعقبة طريق مستقيم ساعة رايح وساعة جاي .
صديقي ابو غضب كبسة معاه و قال هيك زودتها دايما بتعرط وبتكذب واحنا بنطلع ببعض ومنقول مشوها بس توصل معك لقطار عمان العقبة كبرتها وزودتها ، في الاردن قطار مستحيل اي من عمان للزرقاء ما في قطار ، صحيح الطريق مستقيم واي حداد بزبط السكة والقطار نستورده من الصين بس قطار في الاردن مستحيل ، واضاف ابو غضب باص سريع مازبط قطار قطار قطار وبقي يردد قطار في الاردن مستحيل .
وبصراخ مع لطم للخدين ..... قطار في الاردن وكمان من عمان الى العقبة .
ابو غضب كسر طاولة البلاستيك برأسه وضرب الزجاج بيده وخلع الباب وخرج ، بعد هذه الحادثة حرمت ان اكذب او أسولف سواليف غير حقيقية ولكن ولغاية الان البحث جاري عن ابوغضب ويقال انه سافر الى موزنبيق حيث يستمتع بركوب القطار هناك .
